తిరుమలలో శ్రీవారి ఆర్జిత సేవ పట్ల ముస్లిం యువకుని భక్తి... ఆశ్చర్యపోయిన భక్తులు

Header Banner

తిరుమలలో శ్రీవారి ఆర్జిత సేవ పట్ల ముస్లిం యువకుని భక్తి... ఆశ్చర్యపోయిన భక్తులు

  Tue Apr 11, 2017 10:35        Devotional, Telugu

తిరుమలలో శ్రీవారి ఆర్జిత సేవ పట్ల ముస్లిం యువకుని భక్తి ... ఆశ్చర్యపోయిన భక్తులు  

తిరుమల తిరుపతి దేవస్థానం ఈఓగా పీఆర్కే ప్రసాద్ పనిచేసే సమయంలోనే స్వర్ణోత్సవ ఏడాది సందర్భంగా శ్రీవారి ఆలయ చరిత్రలో ఎప్పటికీ నిలిచి పోయేలా ఏదైనా కొత్త పని మొదలుపెడితే బావుంటుందన్న ఆలోచనలో ఉన్నారు. ఆలోచనైతే బాగుంది కానీ, ఎన్ని సార్లు సమావేశమైనా ఆచరణలో మాత్రం ఒక్క అడుగు కూడా ముందుకు పడలేదు. సమయం దగ్గరపడటంతో ఏం చేయాలో పాలుపోక అభాసుపాలు అవుతామేమోనన్న భయం అందరిలోనూ ఆవహించింది. 

దీనిపై టీటీడీ బోర్డు సభ్యులతోపాటు ముఖ్య ఆలయ అధికారులు కూడా ఓ రోజు సమావేశమయ్యారు. స్వర్ణోత్సవ ఏడాది సందర్భంగా స్వామివారికి కొత్తగా ఏం చేస్తే బావుంటుందనే విషయంలో మాత్రం అక్కడున్న పెద్దలు ఒక ఖచ్చితమై అవగాహనకు రాలేక పోతున్నారు. సమయం గడుస్తున్న కొద్దీ ఈఓ పీవిఆర్కే ప్రసాద్‌లో అసహనం పెరిగిపోతుంది.

అదేసమయంలో లోపలికి వచ్చిన ఆఫీస్ అటెండర్ ప్రసాద్ దగ్గరకు వెళ్లాడు. అసలే అసహనంతో ఉన్న ప్రసాద్ అటెండర్ని చూస్తూ మరింత చిరాకుతో ఏంటయ్యా అని అటెండర్‌ను అన్నాడు. దీనికి కంగారు పడిన అటెండర్ తన నోటికి చెయ్యి అడ్డం పెట్టుకుని ముందుకొంగి సార్ మిమ్మల్ని కలవడానికి గుంటూరు నుంచి ఎవరో భక్తుడు వచ్చాడు అని చెప్పాడు. ఎవరయ్యా అతను..ముఖ్యమైన సమావేశంలో ఉంటే నన్ను ఇబ్బంది పెట్టిమరీ చెప్పాల్సినంత అవసరం ఏమొచ్చిందని కోపంతో అన్నాడు. 

అయితే కాసేపు ఆగి కలవమను చెప్పు అని ఈఓ అన్నారు. అలాగే చెప్పాను కానీ ఏదో అర్జెంటుగా మీతో మాట్లాడాలట, అతని పేరు షేక్ మస్తానట అంటూ భయపడుతూ చెప్పాడు అటెండర్. షేక్ మస్తానా అని ముందు కాస్త ఆశ్చర్యపోయినా సిఫార్సు లేఖతో వచ్చిన ముస్లిం భక్తుడిని మా వాళ్ళు నా దగ్గరికి పంపించుంటారని ఈఓ అనుకున్నారు. మళ్లీ బయటకు ఎందుకు వెళ్లడం, రెండు నిమిషాలిక్కడే మాట్లాడి పంపించేస్తే సరిపోతుంది కదా అని మనసులో అనుకుంటూ లోనికిరమ్మని అటెండర్‌తో చెప్పాడు. 

స్వామివారు పంపిన ఆ ముస్లిం భక్తుడి ద్వారా స్వర్ణోత్సవ సంవత్సర వేడుకల సమస్యకు పరిష్కారం దొరకుతుందని ఈఓ గానీ, బోర్డు సభ్యులు గానీ గ్రహించలేకపోయారు.

వెయింటిగ్ హాల్లో ఉన్న ఆ ముస్లిం వ్యక్తి దగ్గరకు అటెండర్ వెళ్లి సార్ మిమ్మల్ని రమ్మంటున్నారు అని చెప్పాడు. చెక్క కుర్చీ లోంచి లేచిన ఆయన అటెండర్‌కి థ్యాంక్స్ చెప్పి బోర్డు రూమ్‌లోకి మెల్లగా నడుచుకుంటూ వెళ్ళాడు. లోనికి వెళ్లిన తర్వాత రెండు చేతులు జోడించి అక్కడున్న వారందరికీ ఎంతో వినమ్రంగా నమస్కారం చేసి ఆ తర్వాత ఈఓ ప్రసాద్ వైపు తిరిగి చెప్పడం మొదలుపెట్టాడు. 

గుంటూరు జిల్లాకు చెందిన నా పేరు షేక్ మస్తాన్, మాది చాలా పెద్ద కుటుంబం. అన్నదమ్ములిద్దరం కలిసి ఒకే ఇంట్లో ఉంటాం. మా కుటుంబాని తిరుమలలో ఓ చిన్నవ్యాపారముంది. తరాలుగా స్వామి వారి సేవలోనే గడుపుతున్నాం. మా తాత ముత్తాతల కాలం నుంచి మా కుటుంబ సభ్యులంతా పద్ధతి ప్రకారం పొద్దున్నే లేచి స్వామి వారి ముందు నిలబడి శ్రీ వేంకటేశ్వర సుప్రభాతం పఠిస్తాం. అలాగే ఏ మాత్రం తప్పులు పోకుండా శ్రీ వేంకటేశ్వరస్వామి ప్రపత్తి, మంగళశాసనం కూడా పఠిస్తామని చెప్పాడు. 

అలాగే ప్రతి మంగళవారం రకరకాల పూలతో 108 నామాలూ పటిస్తూ ఒక్కో నామానికి ఒక్కో పువ్వు చొప్పున సమర్పిస్తూ స్వామివారి అష్టోత్తర శతనామావళి పూజను తరతరాలుగా ఆచరిస్తున్నాం. తన స్వార్జితంతో 108 బంగారు తామర పూలు చేయించి శ్రీవారికి సమర్పిస్తానని మా తాతగారు మొక్కుకున్నారు.మొక్కుకున్నారు గానీ ఆయన ఆరోగ్యంతోపాటు ఆర్థిక పరిస్థితి అంతం మాత్రంగా కావటంతో కొన్ని స్వర్ణ పుష్పాలను మాత్రమే తయారు చెయించగలిగారు. కొన్ని రోజుల తర్వాత మా తాతగారు చనిపోయారని ఆయన తెలిపాడు. 

తాతగారి మొక్కు చెల్లించే బాధ్యత మాతండ్రిగారు తీసుకుని ఒక్కో రూపాయి కూడబెట్టి ఎంతో భక్తితో మరికొన్ని బంగారు పూలు చేయించారు. అంత కష్టపడ్డా ఆయన కూడా మొక్కు తీర్చకుండానే చనిపోయారు. తాత, తండ్రి మొక్కు తీర్చాల్సిన బాధ్యత ఇంటికి పెద్ద కొడుకుగా నా మీద ఉంది. కాబట్టి నా ఆర్థిక పరిస్థితి కూడా పెద్దగా సహకరించకపోయినా ఎంతో కష్టపడి ఆ మిగతా బంగారు పూలు పూర్తి చేయించాను. 

ఈ మధ్యే మొత్తం 108 పూలు పూర్తయ్యాయి. భక్తితో వాటిని స్వామివారికి సమర్పించాలని మా కుటుంబానికి చెందిన 54 మంది సభ్యులం కొద్దిసేపటి కిందటే కాలినడకన పైకి చేరుకున్నాం అంటూ ఈఓ ప్రసాద్‌తో చెప్పాడు. కాసేపాగి అందరివైపు తదేకంగా చూస్తూ తర్వాత అసలు విషయం బయటపెట్టాడు. ఇప్పటికే మీ అమూల్యమైన సమయం చాలా తీసుకున్నాను. కానీ చివరగా పెద్దలందరికీ నాదొక చిన్న మనవి. మూడు తరాలుగా మా కుటుంబ సభ్యులంతా ఎంతో శ్రమపడి ఈ బంగారు తామరపూలు చేయించాం. 

ఒక్కోక్క పుష్పం బరువు 23 గ్రాములు. కాదనకుండా మీరు వీటిని స్వీకరించి ఏదో ఒక సందర్భంలో స్వామివారికి ఉపయోగిస్తే మా కుటుంబం ధన్యం అవుతుందని, అంతే కాకుండా గొప్ప సాయం చేసిన వారవుతారని మస్తాన్ తెలిపాడు. దీంతో మా తాత, తండ్రుల ఆత్మలు కూడా శాంతిస్తాయి. ఇక మీ ఇష్టం...నిర్ణయం మీకే వదిలేస్తున్నానంటూ షేక్ మస్తాన్ మరోసారి అందరికీ చేతులు జోడించి నమస్కారం చేసి తన సంచిని తీసి టేబుల్ మీద పెట్టాడు. 

గుండెలు పిండేసి, రాతిని కరిగించే నిశ్శబ్దం. కొన్ని క్షణాల పాటు అక్కడ ఇంతకంటే వర్ణించటానికి వీలుకాని నిశ్శబ్దం ఆవహించింది. అక్కడున్న వారందరూ గదిలో ఓ మహాశిల్పి చెక్కేసి వదిలేసిన మహాత్ముల శిలా విగ్రహాల్లాగా కుర్చీలకు అతుక్కుపోయారు. గదిలోని ఫ్యాన్ తిరుగుతున్న శబ్దం తప్ప ఆ సమయంలో ఇంకేదీ వినిపించలేదు. సాధారణ మనిషిగా తమ మధ్య నిలబడి ఎన్నో అద్భుత విషయాలు చెప్పిన ఆ గొప్ప ముస్లిం భక్తుడి మాటలకు చేష్టలుడిగిపోయారు. దివి నుంచి దేవదేవుడే దిగి వచ్చాడా? అన్న చిన్న అనుమానం లిప్త పాటులో మహోగ్రరూపం దాల్చిన ఈఓ పివిఆర్కే ప్రసాద్ మనసంతా ఆక్రమించింది. 

అందరి కంటే ముందే తెరుకున్న ఈఓ క్షణం కూడా ఆలస్యం చెయ్యకుండా ఒక్క ఉదుటన లేచి షేక్ మస్తాన్ దగ్గరికి చేరుకున్నాడు. కన్నీటి ధార వర్షిస్తుండగా షేక్ మస్తాన్ రెండు చేతులు పట్టుకుని ఆర్ధ్రతతో మమ్మల్ని క్షమించండి.... మీరెవరో తెలియక నిలబట్టే మాట్లాడించానంటూ తన పక్కనున్న కుర్చీలో కూర్చోబెట్టారు. 

మా సర్వీసులో ఎంతో మంది గొప్ప భక్తుల్ని చూశాం.... కానీ మీ అంతటి అద్వితీయమైన భక్తుడ్ని మాత్రం ఇప్పుడే చూస్తున్నాం. ఒక రకంగా మిమ్మల్ని చూడగలగడం మా పూర్వజన్మ సుకృతం.... బహుశా మిమ్మల్ని ఆ శ్రీనివాసుడే మా దగ్గరికి పంపించాడేమో ఎవరికి తెలుసని ఈఓ అన్నారు. అయితే ఈ అమూల్యమైన బంగారు పూలను తితిదే తరఫున ఒక బాధ్యత కలిగిన అధికారిగా నేను తప్పకుండా స్వీకరిస్తాను. కానీ వీటిని స్వామివారి సేవకు వెంటనే ఉపయోగిస్తానని మాత్రం ఈ క్షణంలో మీకు మాటివ్వలేనని అన్నారు. 

ఎందుకంటే మేము కూడా శ్రీవారి సేవకులమే అయినా ప్రభుత్వం తరపున బాధ్యతలు నిర్వర్తిస్తున్నాం కాబట్టి మాకు కొన్ని పరిమితులుంటాయి. వాటిని అధిగమించడానికి కొంత సమయం పడుతుంది, అయినా సరే ప్రయత్నం లోపం లేకుండా నా వంతు కృషి చేసి వీలైనంత తొందరగా పని పూర్తి చేసి మీకు కబురు చేస్తానని ప్రసాద్ తెలిపారు. మీ చిరునామా, ఫోన్ నెంబర్ మాకిచ్చి వెళ్ళండి మిగతా విషయాలు నేను చూసుకుంటానని అన్నారు. 

మీ కుటుంబ సభ్యులందరికీ దర్శనం, వసతి ఏర్పాటు చేస్తాం. స్వామివారిని దర్శించుకుని వెళ్లండని చెప్పారు. మరో రెండు మూడు సమావేశాల తర్వాత శ్రీవారికి ఒక కొత్త ఆర్జిత సేవను ప్రవేశపెట్టాలని తితిదే బోర్డు ఏకగ్రీవంగా తీర్మానించింది. ఆ సేవలో భాగంగానే స్వామివారికి వారినికొకసారి అష్టోత్తర శతనామావళి పూజను ఈ స్వర్ణ తామరపూలతోనే నిర్వహిస్తున్నారు . గత 30 ఏళ్లుగా ఈ సేవ స్వామివారికి నిరాటంకంగా జరుగుతోంది.



   tirupathi,muslim boy,great ,govinda,